المسار الوظيفي ومجالات العمل في نظم المعلومات الجغرافية

المصدر : منقول عن موقع  https://www.knowledgy.com

هنجاوب علي سؤال ايه هي المسارات لوظيفية المختلفة في نظم المعلومات الجغرافية، وايه المسارات الانسب حسب مجال الدراسة او التخصص العام.

بس عاوز اوضح نقطتين قبل ما نبدأ كلامنا:

النقطة الأولي، يعتبر العلم دا من العلوم المتشعبه نظرا لتداخله في مجالات كتير في الحياة عموما.. ودي نعمه طبعا لتنوع مجالات العمل في نظم المعلومات الجغرافية.

النقطة التانية، ان نظم المعلومات الجغرافية هو علم لتكامل تخصصات مختلفة ومش حكر علي تخصص معين ، هو مجال مفتوح للجميع. 

المهم ندخل في الموضوع.. مجالات العمل في المجال متقسمة لعدة مسارات :

1- تجميع البيانات: 

المقصدو بيها العمل الميداني وتجميع البيانات من الحقل ,, وبيكون في طرق كتير لتجميع البيانات منها بالاستمارات الورقية Questionnaire لو بنعمل استطلاعات رأي Polling , او على خرائط ورقية بتحديث الظاهرات في الواقع على الخرائط،او الخرائط الرقمية على برامج تجميع البيانات الجغرافية على الموبيلات او التابلت..

المجال دا بيكون مفتوح لكل التخصصات، بس اهم حاجه على اللي بيتشغل هنا يكون عنده المعرفه بالخريطة علشان يعرف يستخدم خريطة ورقية في الميدان ويوجه الخريطة او انه يقدر يستخدم برامج المختلفة من تجميع او توقيع البيانات الجغرافية وطبعا دي مهارة متوفرة عند اي حد درس مبادئ جغرافيا او خرائط ..

الي جانب كدا في طرق لرفع البيانات بتكون متقدمة اكثر باستخدام اجهزة GPS عالية الدقة واجهزة مساحية .. ودي بتكون مناسبة لمتخصصين المساحة Surveying والرفع المساحي، الوظايف اللي من النوع دا بتكون مطلوبة في شركات ترسيم الخرائط الرقمية عالية الدقة لشركات اللي بتعمل الخرائط المستخدمه في الملاحة وغيرها من التطبيقات التي تتطلب توافر دقة عالية في البيانات ..

2- انتاج البيانات Data Production:

المسار دا متقسم لمجموعة مسارات فرعية وكل مسار منهم يعتمد على الخبرة والمعرفة وقوة كمل شخص في المجال.... 

أولا تقني نظم معلومات جغرافية GIS Technician:

التقني بيكون مهمته الاساسية هو ادخال البيانات المكانية على قواعد البيانات المكانية سواء من رسم او ترقيم Digitizing  او ادخال بيانات Data Entry للبيانات الوصفية .. وهي مرتبطة بشكل كبير بتحويل البيانات الي تم تجميعها من الميدان للشكل الرقمي على الخرائط، ومن المهارات الاساسية المطلوبة للوظيفة دي هي التعامل مع الخرائط الرقمية والالمام بالادوات المختلفة للترقيم وادخال البيانات.

الافراد المتميزين في الوظيفة دي هما اللي بيقدروا ينتجوا بيانات بجودة عالية وعندهم من الخبرة المناسبة لاستخادم الادوات المناسبة اللي تساعدهم في انجاز الشغل اسرع بنفس الجودة وأفضل.

أنسب التخصصات للمسمى الوظيفي دا هو الجغرافي .. مش شرط يكون دارس نظم معلومات جغرافية بشكل متقدم بس المهم يكون دارس جغرافيا (دارس الجغرافيا بوجه عام) وفاهمها كويس وبيعرف الادوات اللازمة للرسم وادخال البيانات. 

ثانيا، أخصائي نظم معلومات جغرافية GIS Specialist:

الأخصائي بيكون التدرج الطبيعي للتقني، بيقدر يقوم بكل الاعمال اللي بيقوم بيها التقني وزيادة عليها انه بيعرف يعمل Quality Control للبيانات وبيستخدم الTopology بشكل محترف, بالاضافة الي معرفته بطرق الQuery المختلفة , ومن المطلوب منه يعرف يكتب SQL Query لان في برامج بتعتمد على الاكواد زي MapInfo و SuperMap وغيرها..

بالاضافة لكدا بيكون مطلوب منه التعامل مع البيانات الوصفية وطرق حسابها المختلفة باستخدام معادلات وFunctions كتير.. بالاضافة الي انه بيعرف يكتب كود على خفيف في حالة انه عاوز يعالج البيانات او يعدل حاجات معينة سواء في البيانات المكانية او الوصفية.

أنسب التخصصات للمسمى الوظيفي دا هو متخصصي نظم المعلومات الجغرافية من خلفية جغرافية (دارسي الشعبات او الدبلومات بشرط يكون عندهم خلفية جغرافية), بس لازم يدعم خبرته بالكود والمعادلات اللي هيكون محتاجلها في شغله وعشان يقدر يكون مميز عن التقني ..

لحد دلوقتي كدا هنلاقي ان المسميات الوظيفية اللي فاتت هما الاساس في كل الشغل اللي جاي واللي بشغلهم هيتحدد كيفية استخدام البيانات دي في تطبيقات مختلفة.. 

يكفي اننا نعرف ان شركات الخرائط والبرمجيات العالمية اللي بتعتمد على خرائط رقمية في شغلها ورأس مالها واستثماراتها قائم على الوظايف اللي قلناها لحد دلوقتي .. ومن اشهر الشركات دي Google وكلنا عارفين Google Maps و  Google Earth, وغيرها كتير..

ثالثا، الكارتوجرافي:

الكارتوجرافي هو فنان الخرائط وهو الوحيد اللي في ايده يحبب الناس في الخريطة او يبعدهم عنها، عن طريق الالوان والرموز المستخدمة في الظاهرات على الخريطة، ومش اي حد يقدر يعمل Layout بيكون كارتوجرافي.. 

مفيش تخصص محدد للوظيفة دي غير المعرفة الكامله والشاملة بالخريطة ومحتواها واهمية محتواها اللي بيها يقدر يحدد شكل الخريطة، وطبعا يكون ملم بكل اشكال اخراج الخرائط في مجالات متعددة.

 ومن الاسألة المهمه اللي لازم اي كارتوجرافي يجاوب عليها قبل ما يخرج خريطة .... ايه البيانات اللي هعرضها في الخريطة؟ مين هيستخدم الخريطة دي؟ ايه موضوع او عنوان الخريطة؟ ازاي المستخدم هيستخدم الخريطة؟ وايه الابعاد المطلوب اخراج الخريطة بيها؟

وهنا بيكون في معادلة لابد من تحقيقها.. اللي هو: صعوبتها في بساطتها...

طبعا كلنا بنشوف الخرائط الي بتتنشر في الدوريات العلمية او المواقع الاجنبيه بتكون جذابة وبتشدنا اننا نقرهاا وبنكون مستمتعين بقرايتها .. هو دا المقصود بصعوبتها في بساطتها.

ويعتبر من اصعب انواع الخرائط هو الخرائط الجيومورفولوجية لكثرة كم المعلومات الي المفروض تعرضة .. ودا بيكون اصعب اختبار لاي كارتوجرافي انه يخرج خريطة جيومورفولوجية.

مطلوب من الكارتوجرافي انه يستخدم الالوان والرموز المناسبة، لكنه بيتميز لو طور من شغله وابتكر رموز جديدة تعبر عن الظاهرات المكانية بشكل افضل , او يجد اساليب متبكرة في طرق عرض الخرائط.

ملحوظة: في مسابقات بتتعمل في دول غربية في انتاج الخرائط وبيكون معاير الفوز فيها هي كم المعلومات المعروضة في الخريطة وسهولة قراءة الخريطة على غير المتخصصين.

وبوجه عام التخصص دا نادر الوجود في مصر وبلاد شمال افريقيا والشرق الاوسط، اتمنى اننا نشوف متميزين في المجال دا في بلادنا.

3- التحليلات:

المسار دا متقسم لمجموعة مسارات فرعية..

أولا محلل بيانات جغرافية GIS Analyst:

المحلل هو اللي بيقوم بادخال البيانات المتاحه في مجموعة عمليات لاستنتاج معلومات جديدة والخروج بمؤشرات عن البيانات.. بصورة مبسطة بيبني اشكال مختلفة من النمذجة Modeling بمعطيات مختلفة ومن الامثلة على شغل التحليلات,, تحليلات الشبكات , التحليلات ثلاثية الابعاد, التحليلات المتقدمة الخاصة بالبيانات الRaster او حتى البيانات الVector.

مش مقصود بالتحليلات انه مجرد استخدام الادوات المتاحة في اي من برامج الGIS ولكنه بيقوم ببناء علاقة بين مجموعه أدوات (اجراء خطوات متتالية) للخروج بنتيجه جديدة .

ومن اهم المهارات التي واجب توافرها في اي محلل هي الCoding او الScripting، لابد من معرفه كيفية كتابه اكواد باستخدام Syntex مختلف لتطوير التحليلات اللي بيقوم بيها (مش تحليلات معقدة لبرنامج ولا حاجه, بس كود بسيط لتسهيل شغل التحليل وخصوصا لو التحليلات اللي بيعملها ملهاش اداة مباشرة في البرنامج اللي بيستخدمه) ,, ومثال على الاكواد زي VB, Python, MapBasic, Matlap وغيرها كتير..

المحلل مش بس بيقوم باجراء تحليلات وModeling معقدة ,, المفروض انه بيطور من طرق التحليل وممكن يوصل لمرحلة انه ينتج ادوات للتحليل غير متوافرة في اي من برامج المتاحة والمعروف ..

وفي Freelancers في المجال دا بيعملها فعلا ادوات وبيبيعوها على الانترنت , غير ان في شركات متخصصة في كدا ,, بتقوم بانتاج ادوات للتحليل غير متوافرة في البرامج وبتقوم ببيعها للشركات المنتجه للبرامج دي نفسها..

انسب التخصصات للوظيفة دي هم دارسي ومتخصصي نظم المعلومات الجغرافية بشرط معرفتهم باحد لغات التكويد او اكثر من لغة.

ممكن كمان هندسة, علوم الحاسب و حاسبات ومعلومات.. بس بشرط معرفتهم بالمبادئ المكانية/الجغرافية الاساسية, علشا يساعدهم في تصور البعد الجغرافي للبيانات .. الا ان متخصصي نظم المعلومات الجغرافية ممكن يكونوا متقدمين اكتر ولكن بتحقق شرط المعرفة بالكود.

ثانيا احصائي Statistician:

الاحصائي متميز بقدرته التعامل مع الارقام, بالاضافة الي مهارته في التكويد وخصوصا في ارجاء الQuery.. ودا بيأهله انه يقدر يقوم باجراء تحليلات متقدمة على البيانات الوصفية وربطها مع البعد المكاني اذا كان الاحصائي ذو خلفية لها علاقة بالبيانات الجغرافية وانظمة التعامل معها..

وظيفة الاحصائي تعتبر قريبة الي حد ما من المحلل ,, الا انه متميز في تعامله مع البيانات الوصفية والارقام والتلاعب بالبيانات بشكل ااكثر حرفية من المحلل نظرا لمجال خبرته في مجال الاحصاء والرياضيات.

ويعتبر التخصص دا من التخصصات النادرة في مصر، شمال افريقيا والشرق الأوسط, الا انه من اشهر البلاد بهذا التخصص في المنطقة هي دولة المغرب.

اتمنى ان ينتشر ههذا التخصص بشكل اكبر في بلادنا لأهميته ولاهمية دورة في تطوير مجال نظم المعلومات الجغرافية بوجه عام.

ثالثا محلل متخصص GIS (Specialized) Analyst :

المحلل المتخصص هو من احترف ادوات التحليل في صناعه معينه مثل: تحليلات الخاصة بالبنوك,

او تحليلات لخدمة مجال التعدين, او تحليلات متخصصة في التسويق والمبيعات, وغيرها

او لهدف محدد ومنها مثلا: 3D Analysis, Network Analysis, Hydrology Analysis, Spatial Analysis, وغيرها

وممكن يكون المحلل هنا اكثر تخصصا انه مثلا يركز على Network Analysis لمجال التوزيع والمبيعات.. وبيكون كل التحليلات ليها علاقة بتوزيعات, خطوط سير مندوبين المبيعات, تطوير نطاقات البيع جغرافيا, متابعه حرطة البيع وخطوط سير المندوبين بالخرائط الرقمية, وغيرها

الوظيفة دي بتزيد على المحلل العادي انه لازم يكون ملم بكل ابعاد الصناعه او التحليل اللي هيشتغل عليه، علشان يقدر يطور فيه وعلشان يربط بين المسطلحات التقنية الخاصة بالادوات والاخري الخاصة بمجال تطبيق شغله..

الوظيفة دي تعتبر التدرج الطبيعي للمحلل , وانسب التخصصات هنا بتكون زي المحلل بالظبط مع زيادة معرفه بالصناعة اللي عاوز يشتغل فيها.

4- التطوير او البرمجة:

المطورين او المبرمجين في نظم المعلومات الجغرافية بيكون ليهم اكتر من اتجاه ممكن يشتغلوا فيه بحكم التطور السريع للقطاع دا ولتنوع اشكال المخرجات, هنلاقي مثلا الMobile, الWeb, الDesktop, دول 3 اشكال الرئيسية للتطوير في المجال، الا ان الاتجاه في السوق حاليا محليا وعالميا للMobile , Web.

في شكل رابع وهو تطوير الادوات Tools و الFunctions ودي قريبة شوية من المحلل لو بنتكلم عن اداة تحليل.. بس هنا المختلف ان المطور بيقدر بخبرته في الكود بصورة المتعدده انه يطروها بشكل افضل.

وبرده في شركات و Freelancers بيقوما بتطوير وبرمجة ادوات كتير بيبيعوها سواء لمستخدمين او للشركات الكبيرة المنتجة لبرامج نظم المعلومات الجغرافية المعروفة.

انسب التخصصات للوظيفة دي هندسة, علوم الحاسب و حاسبات ومعلومات ..

5- التدريس والتدريب:

مجال التدريس او التدريب اصبح من المجالات الواعدة اللي ممكن استخدام تقنيات نظم المعلومات الجغرافية فيها كأداة للتدريب 

هنلاقي في بلاد كتير غربية الGIS بيتم تدريسة في المدارس الاعدادي او الثانوي,, وعلى سبيل المثال, في الولايات المتحدة الامريكية الطلاب في ثانوي بيدرسوا الجغرافيا وعلوم الارض في المدارس على برامج نظم المعلومات الجغرافية وبيقوما بتطبيق ابحاث ليهم باستخدام البرامج دي (دا وهما في ثانوي لسه مدخلوش جامعه) :)

وهنا هنلاقي عندنا مسارين فرعيين..

أولا المحاضر:

هو من يستخدم الGIS في التدريس كمثال طلاب الثانوي في مدارس امريكا.

ثانيا منتج / مطور وسائل وأدوات تعليمية:

هو من يطور المناهج التدريسية ودعمها بالGIS كاحد الوسائل المهمه للتدريس.

اكتر التخصصات المناسبة للوظيفة دي هم المدربين او المدرسين للعلوم الارضية زي جيولوجيا او جغرافيا او غيرها ..

6- المجالات الهندسية:

من اسمها انه للتخصصات الهندسية, وهنلاقي انها مقسمه لعدة مسارات..

أولا الدعم التقني: هو المسئول عن تنصيب البرامج الخاصة بنظم المعلومات الجغرافية، والتعامل مع اي مشكلات تقنية في البرامج بكافة الاشكال .. بالاضافة الي المعرفه الشاملة بالبرنامج وكل ادواته والرخص الخاصة بتفعيل البرنامج.

ثانيا قواعد البيانات: تعتبر قواعد البيانات هو من أولى الخطوات للعمل على نظام معلوماتي جغرافي .. ولذلك فهناك احتياج لمصمم لقاعدة البيانات بشكل متقدم . قاعدة البيانات هنا مقصودة بما فيها من علاقات بين الجداول والبيانات بانواعها المختلفة Relationship, و الNormalization للسيطرة على حجم قاعدة البيانات والحفاظ عليها من اي مشكلات قد تطرأ ..

بالاضاافة الي المصمم فهناك حاجة لمدير لقاعدة البيانات: فهو من يتحكم في البيانات ومن له القدرة على الاطلاع على بيانات معينه او من له الحق في التعديل او الحذف وغيرها من اوامر يجب متابعتها من قبل مدير قاعدة البيانات للحفاظ علىها وما بها من معلومات 

ثالثا مهندس تقني: هو المسئول عن الServer وكل ما عليه من قواعد بيانات وايضا مسئول عن الBack up والمحافظة على البيانات المخزنة وعن تأمينها من اي مخاطر قد تهددها.

7- التوثيق: 

التوثيق هو مشكلة من اخطر المشكلات في بلادنا , وعلى وجه الخصوص التوثيق التقني. ففي مجال نظم المعلومات الجغرافية هناك العديد من المدخلات ومن الممكن ان يعمل اكثر من شخص او فريق او حتى مؤسسة على نفس المشروع او استخدام نفس قاعدة البيانات,, وبدون التوثيق يصعب على الاطراف المختلفة معرفة الكثير عن البيانات المتاحه لديهم.

مهارة التوثيق عموما تعتمد بشكل كبير على القدرة عن التعبير عن موضوع ما بكلمات بسيطة يفهمها اخرين, وبما اننا بنتكلم عن نظم المعلومات الجغرافية فلابد ان يكون الشخص القائم باعمال التوثيق ملما بالعلم بشكل جيد لسهولة التعبير عن المصطلحات المتخصصة.

مفيش تخصص محدد مناسب للوظيفة دي , فهي معتمدة اكتر على المهارة.

ويعتبر التوثيق من التخصصات النادرة في بلادنا بشكل واضح,, ونتمنى ان ينتشر اكثر لتعم الفائدة وليسهل التعامل مع البيانات او المشروعات متعددة المصدر.

8- الخبراء:

مسار الخبراء يعتمد على سنوات خبرة كبيرة ومن الخبراء نجد المستشارين, المديرين, العلماء والباحثين

9- المستخدم:

المستخدم هو كل من يستعين باحد ادوات نظم المعلومات الجغرافية في اتمام عمله الاساسي, هنا الGIS مش شغله ولكنه اداة بيستخدمها في شغله. ودا الفرق بين المستخدم والتقني .

المستخدم بيكون متخصص في الGIS لمجال شغله وبس وخبرته في التقنيه نفسها محدودة, الا انه خبير في مجال شغله, وهنا بيكون له دور كبير في تطوير العلم دا من خلال تبادل خبرته مع المتخصصين اللي يقدروا يطورا ادوات وبرامج تساعده اكتر وتطور من طرق استخدام الGIS في مجالات مختلفة.

10- الوظائف التكميلية:

واخيرا هنلاقي بعض الوظائف المكملة زي التسويق او المبيعات مثلا,, 

اي شركة GIS بتقدم خدمات او برمجيات هتكون في احتياج لكل المسارات اللي قلنها بالاضافة لبعض الوظائف التتكمليلية .. اكيد هتحتاج حد يسوقلها شغلها ومنتجاتها .. وهتحتاج حد يبيعلها كمان..

بس عشان يتحقق دا مهم ان الي بيشتغلوا في الوظائف التكميلية دي يكونوا ملمين بالمبادئ الاساسية للعلم عشان يكون سهل عليهم التواصل مع السوق والعملاء

هنلاقي ان مفيش تخصص معين ممكن يشتغل , المهم انه لو من خلفية GIS فاهم تسويق وبيع كويس اوي .

او لو كان من خلفيات تانية غير GIS مهم انه يعرف الاساسيات على الاقل لطبيعة المنتج اللي بيقدمه او بيبيعه :) 

------------------------------------

بكدا يكون قدرنا نوضح التنوع الكبير في اشكال المسارات والوظائف في مجال نظم المعلومات الجغرافية.. ونأكد على انه علم يقوم بدور قوي في تكامل وتعاون العلوم والتخصصات المختلفة .. نظم المعلومات الجغرافية مش حكر على تخصص معين بل دا فيه تنوع كبير كدا والباب مفتوح للجميع.. بس على كل حد يحدد خبرته ومهارته ويختار المسار المناسب ليه وبالتوفيق  ان شاء الله..

-------------------------------------

عاوز اشكركم , ومتأسف للأطالة بس كان لازم نوضح كل المسارات الوظيفية للعمل في مجال نظم المعلومات الجغرافية.. 

التدرج دا وصلناله من اطلاع واسع لسوق العمل في المجال في بلاد كتير ومن خبرتنا في سوق الGIS في مصر, الشرق الاوسط والشمال افريقيا على مدار ال10 سنوات الماضية..

اتمنى اني اكون قدرت افيدكم ,, اتمنى اننا جميعا نشوف العلم دا وسوق العمل في المجال بيتوسع بشكل اكبر في كل المسارات اللي قولناها..

----------------

تحياتي ليكم وبالتوفيق

ليصلك كل جديد

👇👇👇

أشترك في قناتنا على يوتيوب  من هنا

تابع صفحتنا على فيس بوك  من هنا
تابع حسابنا على تويتر  من هنا